బాలకాండ శ్లోకాలు: 16-20 (ప్రథమ సర్గ)

సర్వదాభిగతస్సద్భి: సముద్ర ఇవ సింధుభి: |
ఆర్యస్సర్వసమశ్చైవ సదైకప్రియదర్శన: ||    (16)

భూమి మీద ఉన్న నదులకు సముద్రము ఎల ఐతే సమాశ్రయముగా ఉన్నదో, అలాగే రాముడు కూడా మంచి వారికి, శరణు వేడే వారికి సర్వకాలములయందు ఆశ్రయముగా ఉంటాడు, అందరినీ సమానముగా చూసేటటువంటి అలవాటు కలిగిన వాడు, చూడగానే అందరినీ ఆకర్షించేటటువంటి అందం కలిగినవాడు.     (16)

స చ సర్వగుణోపేత: కౌసల్యానందవర్ధన: |
సముద్ర ఇవ గాంభీర్యే ధైర్యేణ హిమవానివ ||  (17)

ఏ పని చేసినా, తన తల్లి ఐన కౌసల్యా దేవి కి ఆనందాన్ని తెచ్చేవాడు, సముద్రము వలే విశాలమైన జ్ఞానము కలవాడు, ఆత్మ స్థైర్యంలో హిమాలయమువంటివాడు.     (17)

విష్ణునా సదృశో వీర్యే సోమవత్ ప్రియదర్శన: |
కాలాగ్నిసదృశ: క్రోధే ల్షమయా పృథివీసమ: ||   (18)

విష్ణువుతో సమానమైనటువంటి వీర్యం కలిగినటువంటి వాడు, పౌర్ణమి చంద్రుడి వలే అందమైన వర్చస్సు కలిగినవాడు, కాలాగ్నితో సమానమైనటువంటి క్రోధం కలిగినటువంటివాడు, కాని సహనంలో పృథివితో సమానమైనటువంటివాడు.     (18)

ధనదేన సమస్త్యాగే సత్యే ధర్మ ఇవాపర: |
తమేవం గుణసంపన్నం రామం సత్యపరాక్రమం || (19)

దానగుణంలో, ఐశ్వర్యంలో స్వయంగా కుబేరునితో సమానమైనటువంటి వాడు. నిజాయితీలో, సాక్షాత్తు ధర్మస్వరూపం, ఇలాంటి సద్గుణాలు కలిగిన రాముడికి, సత్యమే అతిపెద్ద ఆయుధం.    (19)

జ్యేష్ఠం శ్రేష్ఠగుణైర్యుక్తం ప్రియం దశరథస్సుతం |
ప్రకృతీనాం హితైర్యుక్తం ప్రకృతిప్రియకామ్యయా ||   (20)

అణువణువునా రాజ్య సంరక్షణ, ప్రజా క్షేమమే ధ్యేయముగా కలవాడు, దశరధునకు కడు ప్రియమైన వాడు జ్యేష్ఠ కుమారుడైన శ్రీ రఘురాముడు.    (20)